لسه بدري على الأزايز..بقلم حازم امام

بصرف النظر عن نتيجه أي ماتش في الدوري سواء الزمالك أو غيره، لكن بصراحه فكره رمي الطوب والأزايز الفاضيه تعبيرا عن الزعل شئ غريب جدا بيوضح فعلا ان احنا ثقافه الهزيمه عندنا ضعيفه جدا، واللي حصل من جمهور الزمالك بعد ماتش بتروجيت شئ ضايقني جدا، ولازم من خلال كتابتي هنا أعاتب جمهور الزمالك وأي جمهور يفكر يتعامل كده مع لاعبيه خصوصا ان احنا في أول الموسم، ولسه بدري جدا على رمي الأزايز والكلام الفاضي ده، ومش خساره ماتش هي اللي تحسسنا ان الدوري ضاع، لأن لسه بدري جدا على الكلام ده، وكل الفرق هتخسر نقط، وشوفنا ازاي الاهلي طلع خسران من المصري في بدايه الموسم اللي فات وفاز بالدوري في الأخر، وشوفنا في انجلترا الاسبوع ده ازاي مانشيستر خسر من بيرلي الفريق الصاعد الجديد للدوري ومع ذلك الجمهور لم يهاجم فيرجسون، وبالرغم من انه باع تيفيز ورونالدو لكن لسه بيساندوه هناك ، ومش معنى ان احنا مأخدناش الدوري من خمس سنين ان احنا مش هناخده السنه دي ولازم جمهورنا يساندنا، واحنا في انجلترا بنشوف ازاي جمهور ليفربول بيساند فريقه مع انهم مأخدوش الدوري من حوالي 15 سنه .
الهجوم على ميدو شئ ضايقني جدا برضه، لأن ازاي نقدر نحكم على لاعب بقاله كتير ملعبش من مجرد 15 دقيقه لعبها في الماتش ؟!.. يا جماعه براحه شويه على ميدو .
أنا مش عارف ليه الاسماعيلي أقال مدربه بالسرعه دي !!.. انا شايف ان لازم اداره الاسماعيلي كانت تصبر عليه أكتر من كده، خصوصا انه راجل أجنبي ومش عارف كل اللي بيدور حواليه وطبيعي انه يسمع كلام كتير من الناس ويعمل أو ميعملش بيه، لأنه في النهايه له فكره اللي بالتأكيد هياخد وقت لغايه اما ينفذه مظبوط، عموما انا ضد أن أي مدرب يمشي بعد اسبوعين تلاته بناء على نتيجه كام ماتش في الأول، ولازم الحكم يبقى في النهايه مش في الأول .
يا جماعه بجد الدوري السنه دي جامد جدا، وكل الفرق عايزه تفوز، وحاجه تمتع المشاهد قبل اللاعب،ويارب دايما الدوري في بلدنا يبقى قوي كده لأن ده هيفيد المنتخب جدا

نقلا عن مجلة عين.