صرح محمد شعبان لاعب بتروجيت و منتخب مصر لإذاعتنا Goal FM أن مباراة رواندا فى غاية الصعوبة ، نظرا لأن المنتخب الرواندى من المنتخبات الصعبة على ارضها ، و أيضا بسبب حساسية الموقف الصعب لمصر فى التصفيات.
و قال شعبان:"لازم نكون واقعيين ، المباراة صعبة و محتاجة هدوء و خبرة ، انا لو لعبت أساسى و انا اتمنى ذلك هلعب بكل قوتى لان المباراة لا تقبل القسمة على اتنين و مينفعش فيها التعادل ، و ان شاء الله هنفوز و نتأهل لكأس العالم ."
و أضاف شعبان:" ملامح التشكيل باينة فى بعض المراكز لكن فيه مراكز لسه مش متحددة ، بس عموما كابتن حسن شحاتة مش مبين حاجة عشان الكل يفضل ينافس بقوة للآخر .. و لحد دلوقتى مفيش تقسيمات جماعية تبين مين التشكيل الأساسى."
و عن موضوع الصيام أثناء المباراة قال شعبان:"احنا مسلمين ، الدين بتاعنا بيقول لو كنتم مرضى او على سفر ممكن ما تصوموش ، احنا دلوقتى على سفر ، انا من وجهة نظرى الشخصية لو احنا هنسافر 3 ايام انا هفطر يوم الماتش بس ، و لما ارجع هعوضه عموما كابتن حسن قالنا انا مش هجبركم على حاجة ، اللى عايز يصوم يصوم و اللى مش عايز هو حر كل واحد رقيب على نفسه."
و أكد شعبان أن المعسكر سيكتمل بعودة لاعبى حرس الحدود و انبى و سيتدربون مع الفريق غدا بعد الإفطار.
موضوع: شعبان لـGoal FM :مباراة رواندا صعبة .. و ان شاء الله هنكسب 