هل ابراهيم سعيد هيرجع الزمالك ؟
- فيه كلام عن رجوعى للزمالك من اكتر من 20 يوم ، بس الإختلاف فى وجهات النظر عمل مشكلة ، أنا سعيد انى دخلت فى الصورة مرة تانية و أنا أتمنى انى ارجع الزمالك لأن ده شرف كبير لى و لأى لاعب ، و انا سعيد ان فيه ناس بتتكلم عنى بشكل كويس زى كابتن ابراهيم يوسف امبارح على إذاعتكم.
* و ناوى تعمل ايه لو رجعت الزمالك؟
- أنا نفسى اقدم شئ لنادى الزمالك و اعوض كل اللى فات.أنا مديتش النادى ده حقه لما كنت فيه.
* تعتقد ان الجمهور هيسامحك و هينسى المشاكل القديمة ؟
- انا شايف كل الأمور مهيئة و تمهد لرجوعى الزمالك و ده اللى انا عايزه و انا واثق ان جمهوره هيساندنى.
* هل انت ندمان على الايام اللى فاتت؟
- انا نادم جدا على الأيام اللى فاتت لأنى ما قدرتش اوصل لصورة كويسة لابراهيم سعيد ، كان فيه ناس مغرضة هى اللى بتشوه صورة ابراهيم سعيد و انا مقدرتش احسنها ، أنا ربنا فاتحلى الباب لأنى ارجع و اثبت انى بنى آدم كويس ، و الله أعلم ربنا كاتبلى ايه بس انا واثق انه مش هيسيبنى.
* ايه هدفك فى المرحلة القادمة؟
- انا عايز اوصل لصورة بعيدة عن ابراهيم سعيد المشاغب و المشاكس و كل اللى بيتقال عنى ، و بتمنى انى انجح سواء رجعت الزمالك او مارجعتش. و انا عايز كمان ارجع منتخب مصر و لو رجعت بجد هعمل لنفسى اسم و سمعة كويسين و هشرف مصر.
* ايه حقيقة مفاوضات المصرى معاك؟
- انا كان المفروض انى ارجع المصرى و كامل ابو على فعلا كلمنى ، و بعدين النهارده ابو على صرح ان ابراهيم سعيد مش هيلعب فى المصرى فى عهده أبدا. الغريب ان هو قعد معايا و اتفقنا على المقابل المادى (700 الف فى الموسم) ، بعدين معرفش اللى حصل و غير موقفه بالشكل الغريب ده.
* ايه اللى حصل معاك فى الإسماعيلى؟
- انا ما عملتش مشاكل فى الاسماعيلى ، و عمرى ما زايدت عليهم بالإنتقال للأهلى أو للزمالك زى ناس كتيرة و معروفة.
* مين اللى بيشوه صورة ابراهيم سعيد؟
- الإعلام الأهلاوى.
* و انت ليه مابتردش؟
- انا مش قد الإعلام الأهلاوى اللى هاجمنى بكل قوة
هل تنقلك بين أكثر من نادى أضاف لك أم العكس؟
- اللاعب فى عصر الإحتراف لازم يبقى مخلص للفانلة اللى بيلعب بيها أيا كانت قبل أى اعتبارات.
* يعنى انت بتعترف بأخطاءك؟
- مفيش انسان لا يخطئ ، أنا اخطأت ، بس أخطائى بيتم تضخيمها من الإعلام و بتوصل للناس بأنها خطيئة مش خطأ.
* زمايلك اللى كانوا معاك فى المنتخب ايام 2006 .. بيلعبوا دلوقتى و انت بتتفرج من برة .. هل انت حزين بسبب ده؟
- طبعا أنا حزين بأنى قاعد و ما بلعبش مع المنتخب لأن فانلة المنتخب شرف كبير و مسئولية اكبر ، بس أنا لو قعدت اعيط مش هانجح ، انا كان لازم تحصلى كبوة عشان اتعلم ، انا اتعلمت حاجة واحدة من كل اللى حصلى ، انى اتحدى نفسى قبل ما اتحدى الناس .
* ايه اللى تثبت بيه للناس انك اتغيرت؟
- انا لو قعدت اقول انى هتغير مفيش حاجة هتتغير ، انا نفسى العب كورة بس ، تغييرى هو ادائى و سلوكى اللى الناس هتشوفنى عليه.
*هل لمشاكلك الشخصية دخل فى مشاكلك الكروية؟
-من سنة 97 الكلام هو هو بيتكرر ، مشاكلك الشخصية ، مشاكلك الأسرية ، مشاكلك مشاكلك مشاكلك . أنا لاعب كرة ، التقييم يبقى على أدائى فقط. و انا مش عايز اتكلم فى حياتى الشخصية. مفيش بيت فى مصر مفيهوش مشاكل ، ليه انا اللى الناس بتتكلم عنه و عن بيته؟